- Malami Ya Buƙaci Shugaban EFCC Ya Janye Hannu: “Ba Za Ka Iya Bincike Na Ba”
Tsohon Antoni-Janar na Tarayya kuma Ministan Shari’a, Abubakar Malami, SAN, ya buƙaci Shugaban Hukumar Yaƙi da Cin Hanci da Rashawa (EFCC) da ya janye kansa daga duk wani bincike ko shari’a da ake danganta shi da Malami, yana mai cewa ba zai iya samun adalci a ƙarƙashin jagorancinsa ba.
A cikin wata sanarwar manema labarai da ofishinsa ya fitar, Malami ya bayyana cewa tsarewa, bincike da barazanar gurfanarwa da EFCC ke yi masa ba su da alaƙa da bin doka, illa dai ramuwar gayya ta siyasa sakamakon sauya sheƙarsa zuwa jam’iyyar African Democratic Congress (ADC).
Malami ya ce abin da EFCC ke yi masa ya samo asali ne daga tsohuwar ƙiyayya da ramuwar kai ta kashin kai, musamman daga Shugaban EFCC na yanzu. Ya tunatar da cewa a lokacin da yake Antoni-Janar, gwamnatin tarayya ta kafa Kwamitin Binciken Shari’a na Mai Shari’a Ayo Salami domin bincikar manyan zarge-zargen cin hanci da rashin amfani da ofis a EFCC.
A wancan lokaci, Shugaban EFCC na yanzu shi ne Sakataren Kwamitin. Rahoton kwamitin—wanda ke hannun jama’a—ya ƙunshi sakamako masu nauyi, ciki har da abubuwan da suka shafi Shugaban EFCC na yanzu, musamman a Babi na 9, har ma da shawarar yiwuwar gurfanarwa.
Malami ya ce a wannan haske ne ake ganin binciken da ake yi masa a yau—wanda ya haɗa da tsarewa ba bisa ka’ida ba, gallazawar kafafen watsa labarai, da karya ƙa’idoji—a matsayin ramuwar gayya, abin da ke zama cin zarafin iko da take dokar kasa.
Saboda haka, Malami ya nemi Shugaban EFCC ya janye kansa nan take daga duk wata alaƙa da bincike ko shari’ar, tare da miƙa lamarin ga wata hukumar tsaro ko shari’a dabam domin dawo da amincewar jama’a da mutuncin doka.
Haka kuma, ya roƙi Antoni-Janar na Tarayya na yanzu, a matsayinsa na babban lauya na ƙasa, da ya shiga tsakani domin hana lalata tsarin shari’a da kuma kauce wa amfani da iko don bukatun siyasa ko na kashin kai.
Malami ya jaddada cewa ko dai a gurfanar da shi gaban kotu nan take ko a sake shi, yana mai nuni da tanade-tanaden Sashe na 35 (3), (4) da (5) na Kundin Tsarin Mulkin Najeriya na 1999 (da aka yi wa kwaskwarima), wanda ya wajabta gurfanarwa cikin awanni 24.
Ya ce kotu kaɗai ce ke da ikon yanke hukunci cikin adalci, ba hukumomin da ake zargin sun gurɓata da siyasa ba.
A wani zargi mai tayar da hankali, Malami ya ce EFCC na ƙoƙarin dogaro da mutanen da kotunan ƙasashen waje suka yanke musu hukunci, kuma har yanzu suna ƙarƙashin hukunci, a matsayin shaidu a kansa. Ya ce maimakon a bi hanyoyin miƙa su (extradition) yadda doka ta tanada, ana amfani da su wajen cimma muradun siyasa
